Bo tin pregunta relashoná ku Atlas di Impakto di Klima pa Boneiru, Sint Eustatius i Saba (BES)? Por ta bo por haña e kontesta riba e página akí di Preguntanan frekuente. Bo pregunta no ta riba e lista akí? E ora ei tuma kontakto ku nos via Kontakto.
General
Pa ken Atlas di Impakto di Klima BES ta?
Atlas di Impakto di Klima prinsipalmente ta dirigí na profeshonalnan ku direktamente òf indirektamente ta enbolbí ku adaptashon di klima na islanan BES. Sinembargo siudadano i otro personanan interesá tambe por usa e atlas. Aktualmente por usa e atlas pa diálogonan tokante riesgo. E atlas no ta adekuá ainda pa traha plan di adaptashon.
Di kiko e atlas ta konsistí?
E atlas ta kontené mapanan i storianan tokante klima di Boneiru. Ademas e ta ofresé statistika di klima pa Boneiru i pa Saba i Sint Eustatius. Den futuro, ta desaroyá tambe mapa i storia pa Saba i Sint Eustatius.
Kon por usa e mapanan den e atlas?
Por usa e mapanan den e atlas pa haña un promé impreshon di e konsekuensianan físiko di kambio di klima den un área, i kon esaki por afektá residente i medio ambiente. E mapanan por yuda tambe pa pone e tópiko di adaptashon di klima riba agènda polítiko.
Kiko a pone ku a desaroyá Atlas di Impakto di Klima?
A desaroyá Atlas di Impakto di Klima Hulandes na 2007, tempu ku vários provinsia hulandes i instituto di investigashon a sinti e nesesidat pa hasi informashon nashonal di klima mas aksesibel. For di 2012, Climate Adaptation Services (CAS) a manehá e atlas akí . Na 2023, Ministerio di Infrastruktura i Maneho di Awa a enkargá CAS pa desaroyá un Atlas di Impakto di Klima pa islanan BES. Lesa mas tokante nos aki.
Ku ki frekuensia ta aktualisá Atlas di Impakto di Klima?
Nos ophetivo ta pa aktualisá Atlas di Impakto di Klima BES ku mapa adishonal nobo na kualke momentu ku un oportunidat surgi, i tin informashon nobo.
Uso
Kon bo ta usa Atlas di Impakto di Klima BES?
Atlas di Impakto di Klima ta yuda bo haña un promé impreshon kon kambio di klima ta afektá islanan BES. E atlas ta konsistí di mapanan i storianan di klima pa Boneiru. E ta kontené tambe statístika di klima pa Boneiru i pa Sint Eustatius i Saba.
Kiko bo por hasi ku Atlas di Impakto di Klima?
Pa gobièrnunan lokal i regional, e atlas ta forma un base pa diálogo tokante riesgo. Ademas e atlas ta relevante pa por ehèmpel establesimentunan di enseñansa, studiantenan di universidat, empresa i residente.
Kon bo por usa storianan di klima?
E storianan di klima ta duna informashon adishonal di fondo pa e mapanan ku ta mustra den e sekshon di mapa. Nan ta konta bo kiko bo ta mira riba e mapanan i yuda bo traha ku e informashon. E atlas ta inkluí storianan tokante klima manera: kostanan den futuro, temperatura di superfisie di tera i salú di ref di koral. Pa haña akseso na e storianan tokante klima, klek riba e tèp den e balki di menú. Tambe bo por klek riba e boton “mas informashon” bou di e leyenda na man drechi di e skrin pa bai na storianan tokante klima.
Kon ta usa e mapanan?
E sekshon di mapa ta kontené tur mapa. Na man robes di e skrin, bo ta mira un hòki titulá “Agregá kapa di mapa”. Den e hòki akí, bo por selekshoná e kapanan di mapa relevante. E funshon di zoom ta permití usadónan pa zoom bai den nan propio bisindario.
Kon bo por mira kapanan di mapa?
Bo a selekshoná un òf mas kapa di mapa den e hòki na man robes? Despues klek riba “Miira kapanan di mapa” den e huki ariba na man drechi. Ta aparesé un hòki ku ta pèrmití bo selekshoná un senario di klima. Bo por kompará e klima aktual ku kuater senario: senario “Bou”, ku un kambio di klima limitá, i senario “Haltu”, den kua klima ta kambia signifikantemente na 2050 i na 2100. E áreanan shinishi bou di kada kapa di mapa ta indiká e senarionan disponibel pa e mapa spesífiko ei. Bo no ta mira un mapa ora bo klek riba dje? Ta probabel ku e mapa ei no ta disponibel pa e senario ku bo a selekshoná. Purba selekshoná e klima aktual òf un otro senario.
Informashon
Kua ta e diferensia entre e mapanan i e storianan di klima?
E sekshon di mapa pa ta mustra tur mapa ku un splikashon kòrtiku. E storianan di klima ta duna informashon di fondo tokante e kapanan di mapa prinsipal i por asistí bo pa usa e mapanan ei.
Kon mi por download imágen di mapa?
Pa download un imágen di mapa den e formato PDF, klek riba e íkono di prenter den e sekshon di mapa. Pa optené fail di GIS, por fabor usa e formulario bou di e tèp di “Download informashon”.
Por download informashon korespondiente?
Por optené fail di GIS via e formulario ku por haña bou di e tèp di “Download informashon”. Esaki ta grátis, komo ku e failnan ta kontené informashon habrí ku Geopackage/Geotiff ta suministrá. Bo ta usa informashon for di Atlas di Impakto di Klima BES? E lisensia Creative Commons (CC BY 4.0) ta kubri e informashon akí. Esaki ta nifiká ku mester akreditá su fuente sitando “Atlas di Impakto di Klima BES, 2023”. Ademas nos ta sugerí pa hasi referensia na fuente di e informashon korespondiente. Pa sa kua organisashon a desaroyá e mapa, konsultá e fuente bou di leyenda.
Ki tipo di informashon a usa pa e atlas?
Atlas di Impakto di Klima ta basá riba informashon habrí i por usa esaki gratuitamente. Ademas di duna un promé impreshon kon kambio di klima por afektá islanan BES, awor i den futuro, e atlas ta kontené tambe mapa ku informashon básiko, manera geologia.
Kon bo por usa e informashon den ArcGIS?
Bo ke usa informashon di Atlas di Impakto di Klima BES den bo mes GIS sin download e informashon korespondiente? Download e kapanan di mapa di Atlas di Impakto di Klima den bo GIS komo servisio di mapa online den e formato di WMS (Web Mapping Services). Usa e UR aki pa esaki.
Por usa informashon di Atlas di Impakto di Klima BES pa otro aplikashon?
Komo ku Atlas di Impakto di Klima BES ta kontené informashon habri, organismonan di gobièrnu i personanan privá por usa e informashon den nan aplikashonnan, manera diálogonan lokal di riesgo. Bo ta usa informashon di Atlas di Impakto di Klima BES? Creative Commons license (CC BY 4.0) ta kubri e informashon akí. Esaki ta nifiká ku mester akreditá su fuente sitando “Atlas di Impakto di Klima BES, 2024”. Ademas nos ta sugerí pa hasi referensia na e fuente di informashon korespondiente. Pa sa kua organisashon a desaroyá e mapa, mira e fuente bou di leyenda.
Kuantu ta kosta pa usa informashon for di Atlas di Impakto di Klima?
Atlas di Impakto di Klima BES ta un plataforma habri: e informashon den dje ta públiko. Konsekuentemente por usa e informashon for di e atlas gratuitamente. Den e sekshon di mapa, por download informashon den e formato di PDF, gratuitamente. Pa download informashon den e formato GIS, tambe gratuitamente, por fabor usa e formulario ku ta duna riba e Página pa download informashon.
Ken ta responsabel, den kaso ku e informashon den e atlas ta inkorekto?
Intenshon di e mapanan den e atlas ta pa haña un idea di e alkanse di efektonan di klima, i pa pone e tópiko di adaptashon di klima riba agènda polítiko. Komo ku e mapanan ta duna un promé impreshon, nan no ta hustifikashon pa tumamentu di desishon na nivel lokal. Konsekuentemente e institutonan di investigashon i CAS ta rechasá kualke responsabilidat pa konsekuensianan di asumshon basá riba teksto òf mapa for di Atlas di Impakto di Klima.
Kon presis e informashon ta? Kua ta su resolushon?
E mapanan den Atlas di Impakto di Klima BES ta duna un bista na nivel di isla. Na nivel lokal, e bista ku ta duna normalmente ta aproksimadamente i indikativo. E resolushon espasial ta diferensiá di un kapa di mapa pa e siguiente. Pa haña mas informashon tokante un mapa, klek riba e boton di “Mas informashon” den kada kapa di mapa.
Infomashon tokante mapa
Ken a desaroyá e mapanan den e atlas?
Vários instituto di investigashon a desaroyá e mapanan den Atlas di Impakto di Klima BES. Pa sa ken a desaroyá un mapa, klek riba e boton di “Mas informashon” den kada kapa di mapa. Bo ta haña e boton akí na man drechi, den e hòki “Mira kapanan di mapa” bou di leyenda. Ademas bo por lesa mas tokante nos aki.
Kiko Atlas di Impakto di Klima ta bisa tokante e alkanse di kambio di klima?
Nos no por ta sigur kon eksaktamente nos klima lo ta den futuro. Na òktober 2023, Instituto Meteorológiko Real Hulandes (KNMI) a aktualisá e senarionan di klima pa Hulanda i islanan BES. E senarionan ta basá riba dos eskala:
-
E insertidumbre den emishon, ku ta varia di Bou (oumento limitá di temperatura, di akuerdo ku Akuerdo di Paris) pa Kayente (oumento haltu di temperatura– senario ku emishon di mas haltu).
-
E modelo di klima di rango, ku ta varia di Seku (ménos yobida anual) pa Muhá (oumento di yobida anual).
Huntu e senarionan ta representá un rango den kua ta probabel ku kambio di klima ta desaroyá. Atlas di Impakto di Klima BES ta reflehá e dos senarionan ku mas ta diferensiá. E senario haltu ta respondé ku e pió senario, esun mas haltu di e kuater senarionan. E senario bou ta korespondé ku esun mas abou di e kuater senarionan, den kua e kambionan ta keda mas limitá. Pa kada kapa di mapa, Atlas di Impakto di Klima ta mustra solamente e senarionan disponibel. No tur senario ta disponibel tur ora.
Mas informashon di e senarionan di KNMI 23 ta disponibel aki.
Atlas di Impakto di Klima ta reflehá tur potensial efekto di klima?
E sekshon di mapa ta kontené kapa di mapa basá riba disponibilidat di informashon habrí. No a òf no por pone tur potensial efekto di klima riba mapa.